نفسي بجد نفسي

نفسي أغمض وأفتح .. ألاقيني حد تاني

حد ناسي الزمن .. ناسي الكلام والمعاني

نفسي أنسى حالي .. وأبعد وأسيب مكاني

يمكن ألاقي حاجة .. ترجع الأحلام والأماني



نفسي أشوف قلب .. من غير لحظة وجع

قلب مايعرفش مر .. ومن طعم السعادة شبع

نفسي أشوف حلم ضايع .. وفي لحظة ألاقيه رجع

نفسي ألاقي فجر الحق .. وسط ليل الظلم طلع



نفسي يا دنيا يوم .. تحقق فيكي الأحلام

أنسى كل الهموم .. أغمض عيوني أنام

نفسي الدنيا وما فيها .. يعيشوا في حب وسلام

واترمي في حضن أمي .. وانسى كل الكلام



نفسي الحب الحقيقي .. يدق على كل باب

الحب يشفي جروحنا .. ونكون كلنا أحباب

ولا حد يجرح حد .. ولا نعرف طعم العذاب

ونفتكر إن لينا رب .. بيسبب كل الأسباب



يا عالم فوقوا واصحوا .. حياتنا دي قدر

تعبنا غدر وذل .. وقلوبنا تعبها السفر

ده ظلام الليل القاسي .. كسروا ضوء القمر

وربنا قادر وعادل .. بيرزق الطير ع الشجر







إهداء لكل مَنْ قرأ هذه الكلمات وفهم معانيها

لكل مَنْ حزن يومًا أو أصابه من جراح الدنيا نصيبه

ودعواتي لكم جميعًا بكل خير